“ЗИНДАГИНОМАИ БЕДИЛ” асари бедилшинос  Бобобек Раҳимӣ мебошад, ки соли  2017 бо ҳаҷми  496 саҳифа дар нашриёти «ЭР-граф»-и шаҳри Душанбе нашр шудааст. Рисола дар заминаи осори Бедил, манбаъҳои адабию таърихӣ ва адабиёти мавҷудаи илмӣ таълиф шуда, лаҳзаҳои асосии зиндагии Бедилро дар бар мегирад. Дар асар роҷеъ ба замони кӯдакӣ, ҷавонӣ ва пирии шоир, давраи мактабу мадраса, сафарҳои гуногуни ӯ ва ҳаёти устодони маънавияш, иртиботи ӯ бо шоирони ҳамзамонаш, муносибаташ ба хокимони аср, хислатхои шахсии шоир, лаҳзаҳои охирини зиндагии Бедил, таърихи вафот ва анъанаи таҷлили Урси Бедил маълумотҳои илман асоснок  пайдо кардан мумкин аст.

Ин китоб санаи 28-уми ноябри соли 2017 ба шуъбаи пурракунӣ ва коркарди адабиёти Китобхонаи вилоятӣ ворид шудааст.

«ОИЛА - АСОСИ ВАТАНДОРӢ» китоби собиқ раиси шаҳри Хуҷанд Раҷаббой Аҳмадзода мебошад, ки соли 2015 ба муносибати Соли оила барои оммаи васеи хонандагон, бахусус тарғибгарон, кормандони кумитаҳои маҳаллаҳо, омӯзгорону тарбиятгарон тавассути нашриёти “Меъроҷ”-и шаҳри Хуҷанд бо ҳаҷми  368 саҳифа нашр шудааст. Китоб дар бораи оилаҳои машҳури шаҳри Хуҷанд, хонадонҳои обрӯманд, ашхоси номвар ва шахсиятҳое, ки дар ташаккули ҷомеаи навин хидмат кардаанд, нақл мекунад. Муаллиф ва таҳиягарон бо нашри ин китоб саҳми худро дар тарғиби сиёсати Ҳукумати Ҷумҳурии Тоҷикистон оид ба оила, тарбияи ватанпарварӣ ва инсондӯстии насли наврасу ҷавон, вусъатбахшии афкори ҷомеа гузоштаанд. 

Ин китоб санаи 28-уми ноябри соли 2017 ба шуъбаи пурракунӣ ва коркарди адабиёти Китобхонаи вилоятӣ ворид шудааст.

“Армуғони аҳли дил” баргузида ва тарҷумаи ғазалҳои Камоли Хуҷандӣ мебошад, ки ба муносибати баргузории конференсияи байналмилалии «Камоли Хуҷандӣ: ташаккули адабиётшиносӣ ва равобити адабӣ» (28-29-уми октябри соли 2016) ба кӯшиши доктори илмҳои филология Фахриддин Насриддинов омода гардидааст. Ин китоб аз дастовардҳои тозаи Муассисаи давлатии “Маркази илмии Камоли Хуҷандӣ” дар самти таблиғу нашри осори Хоҷа Камоли Хуҷандӣ мебошад.  Ғазалҳои Хоҷа Камоли Хуҷандӣ дар ин китоб ба забонҳои олмонӣ (тарҷумаи Александр Ҳайзер), англисӣ (тарҷумаи Бахтиёр Олимов), русӣ (тарҷумаҳои И. Селвинский, А. Адалис, В. Звягинсева, В. Потапова, М.Синелников дар таҳриру веростории Матлуба Хоҷаева ), ӯзбекӣ (тарҷумаи Муҳаммадҷон Васфӣ  дар таҳрири Абдусалом Абдуқодиров), урдӯӣ (тарҷумаи Муҳаммадсиддиқи Шиблӣ бо веростории Орифи Навшоҳӣ) тарҷума шуда, ҳамчунин ба забону хатти форсӣ низ баргардон шудаанд.

Намояндагони забонҳои гуногун тавассути ин китоб бо каломи шаккарини Хоҷа Камол унсу ошной пайдо хоханд кард.

Китоби дарсӣ дар нашриёти «ЭР-граф»-и шаҳри Душанбе соли 2017 дар ҳаҷми 424 саҳифа, бо теъдоди 500 нусха нашр гардидааст. Ин китоб дар мувофиқат бо таркиби ҳатмии Стандарти давлатии маълумоти олии касбии маориф ва илми Ҷумҳурии Тоҷикистон оид ба фанни «Маркетинг» барои як катор равияҳо ва ихтисосҳо аз тарафи доктори илмҳои иқтисодӣ, профессор кафедраи менеҷменти Донишкадаи молия ва иқтисоди Тоҷикистон Бозоров Шавкат омода гардидааст. Китоби дарси бо Қарори Мушовараи Вазорати маориф ва илми Ҷумҳурии Тоҷикистон № 31/16 аз 30 декабри соли 2015 ба нашр тавсия шудааст. Дар китоби дарсӣ масъалаҳои назариявӣ ва самтҳои амалии маркетинг маҷмуан баррасӣ ва бо мисолҳои стратегияи маркетингии корпоратсияҳои машҳур ва кейсҳо тасвир шудаанд. Дар китоб ба таҷриба ва дурнамои маркетинг дар Тоҷикистон диққати махсус дода шудааст.

Китоби дарсӣ барои донишҷӯён ва магистрантони ихтисосҳои иктисодӣ, аспирантҳо, шунавандагони мактабҳои бизнес ва менеҷмент, ҳамчунин маркетолог ва топ-менеҷерони корхонаҳои ватанӣ пешбинӣ гардидааст.